وہاڑی (حکیم ایم شمعون نذیر کھوکھر سے ) وہاڑی کی صحافتی دنیا کے روشن نام، وہاڑی پریس کلب کے بانی رکن اور سینئر صحافی چوہدری غلام باریؔ کی گیارہویں برسی عقیدت و احترام کے ساتھ منائی گئی۔ چوہدری غلام باریؔ کا شمار ان شخصیات میں ہوتا ہے جنہوں نے اپنی چار دہائیوں پر مشتمل صحافتی زندگی میں ہمیشہ اصول، سچائی، مثبت سوچ اور عوامی ترجمانی کو اپنا مشن بنائے رکھا۔
وہ چالیس سال سے زائد عرصہ روزنامہ نوائے وقت کے ساتھ وابستہ رہے، جبکہ روزنامہ امروز، خیام اور حرارت میں بھی مسلسل عوامی مسائل، امن، صوفیائے کرام کی تعلیمات، آرائیں برادری کی تاریخ اور علاقائی روایات پر قلم اٹھاتے رہے اور ایک ہزار سے زائد مستند کالم تحریر کیے۔
وہ پی ایف یو جے کے فعال رکن، کونسل آف آل پاکستان پریس کلبز کے فنانس سیکرٹری اور نظریہ پاکستان ٹرسٹ وہاڑی کے بانی ضلعی صدر بھی رہے۔ ضلعی انتظامیہ نے ان کی بے مثال خدمات کے اعتراف میں 2009 میں "Living Legend” کا اعزاز دیا تھا۔
ان کی گیارہویں برسی کے موقع پر ان کے صاحبزادے سینئر صحافی چوہدری احسان باری، سینئر سول جج چوہدری ذوالفقار باری، سماجی رہنما چوہدری وسیم باری، قانون دان چوہدری وقار باری ایڈووکیٹ اور دیگر اہلِ خانہ نے کہا کہ ہمارے والد شفیق، محبت کرنے والے اور اعلیٰ کردار کے حامل باپ تھے۔ آج جو ہم کسی مقام پر کھڑے ہیں یہ ان کی تربیت، محنت اور دعاؤں کی بدولت ہے۔ ہم اپنے تمام پیاروں، دوستوں اور بزرگوں کے شکر گزار ہیں جنہوں نے والدِ گرامی کو دعاؤں میں یاد رکھتے ہیں۔
اس موقع پر ینگ جرنلسٹ گروپ کے گروپ لیڈر ڈاکٹر عرفان چوہدری نے اپنے خصوصی پیغام میں گروپ کے صدر چوہدری احسان باری کے نام کہا کہ چوہدری غلام باری وہاڑی پریس کلب کے بانی رکن اور باوقار صحافی تھے۔ ہم نے صحافت کا راستہ انہی کے کردار اور ان کے نام کو دیکھ کر اپنایا۔ ان جیسی شخصیت نہ کبھی آئی نہ آئے گی۔ ہم ان کی گیارہویں برسی پر انہیں دل کی گہرائیوں سے خراجِ تحسین پیش کرتے ہیں۔
جنرل سیکرٹری ینگ جرنلسٹ گروپ مبشر مجید مرزا نے بھی اپنے بیان میں کہا کہ ہم دعا گو ہیں کہ اللہ تعالیٰ اس عظیم شخصیت کو جنت الفردوس میں اعلیٰ مقام عطا فرمائے۔ ینگ جرنلسٹ گروپ کے دیگر ممبران نے بھی اپنے پیغامات میں کہا کہ چوہدری غلام باریؔ اگرچہ آج ہمارے درمیان موجود نہیں مگر ان کا کردار، ان کی جدوجہد، ان کی خدمات اور ان کی روشن سوچ آج بھی وہاڑی کی صحافت کے لیے مشعلِ راہ ہے۔