شوق سے لگایا پودا توڑ دیا گیا، شہری کا شدید ردعمل

وہاڑی( ذیشان چوہدری سے)محمدی گلی بلال ٹاؤن تین مرلہ سکیم 9/11wb میں محنت سے لگایا گیا شتوت کا درخت تباہ، شہری کا شدید ردعمل۔ وہاڑی کے علاقہ نو 11 ڈبلیو بی، تین مرلہ اسکیم بلال ٹاؤن 9/11wb کی محمدی گلی میں ایک افسوسناک واقعہ پیش آیا، جہاں ایک شہری کی جانب سے اپنے گھر کے سامنے محنت اور لگن سے لگایا گیا شتوت کا درخت نامعلوم افراد نے بے دردی سے تباہ کر دیا۔
تفصیلات کے مطابق مذکورہ شہری نے اپنے گھر کے فرنٹ پر شتوت کا پودا لگایا تھا اور اسے دن رات محنت کر کے پانی دے کر پروان چڑھا رہا تھا تاکہ یہ درخت بڑا ہو کر سایہ فراہم کرے اور پھل دے۔ تاہم کچھ کم عقل اور غیر ذمہ دار افراد نے چند روز قبل بھی اس پودے کو نقصان پہنچایا، اور گزشتہ روز جمعہ کو اس کے مضبوط تنے کو توڑ کر مکمل طور پر زمین بوس کر دیا۔
متاثرہ شہری نے درخت کی اس حالت کو دیکھ کر شدید غم و غصہ اور افسوس کا اظہار کرتے ہوئے کہا کہ ایک ایسا درخت جو آنے والے وقت میں سایہ اور پھل فراہم کرنے والا تھا، اسے بڑا ہونے سے پہلے ہی بے دردی سے مسل دیا گیا، جو نہایت گھٹیا اور افسوسناک عمل ہے۔اہلِ علاقہ، مقامی مکینوں اور سول سوسائٹی کے افراد نے بھی اس واقعے کی مذمت کرتے ہوئے کہا ہے کہ ایسے منفی رویے معاشرتی بے حسی کی عکاسی کرتے ہیں۔ انہوں نے شہریوں پر زور دیا کہ وہ ذمہ دارانہ رویہ اپنائیں اور اپنے علاقوں میں اس طرح کے واقعات کی روک تھام کے لیے کردار ادا کریں تاکہ ماحول دوست اقدامات کی حوصلہ افزائی ہو اور کسی کی محنت ضائع نہ ہو۔